Turmush — Москва районунун Нарзан айыл аймагына караштуу Беловодск айылында тарбиячылар кол өнөрчүлүк боюнча мастер-класс өткөрүштү. Бул тууралуу райондук билим берүү бөлүмүнүн башчысы Айгүл Султаналиева билдирди.
Анын айтымында, иш-чара «Колокольчик» балдар бакчасынын базасында өттү. Ага мектепке чейинки билим берүү мекемелеринин тарбиячылары катышты.
«Президенттин “Улуттук дем — дүйнөлүк бийиктик” уңгужол жарлыгын ишке ашыруу максатында мектепке чейинки билим берүү мекемелеринин тарбиячылары үчүн кол өнөрчүлүк боюнча мастер-класс өткөрүлдү. Анда улуттук баалуулуктар даңазаланып, кол өнөрчүлүк боюнча көргөзмө уюштурулду.
Катышуучулар чоподон идиш жасоо, токуу өнөрү, кийиз менен иштөө жана табигый материалдарга сүрөт тартуу боюнча чеберчиликтерин көрсөтүштү. Бул иш-чара тарбиячылар арасында тажрыйба алмашууга шарт түздү», — деди ал.
Ошондой эле иш-чарада слайд-шоу көрсөтүлүп, балдар «Манас» эпосунан үзүндү айтышты. Мындан тышкары, жазуучу Чыңгыз Айтматовдун «Ак кеме» повестиндеги Баланын образын сахналаштырып, өз өнөрлөрүн тартуулашты.