Turmush — Ысык-Көл райондук мамлекеттик администрациясында жайкы туристтик сезонго даярдык боюнча жыйын өттү, деп билдирет аймактык кабарчы.
Маалыматка караганда, жыйынга райондогу эс алуу үйлөрүнүн жана конок үйлөрүнүн жетекчилери, ошондой эле район акими Жапарбек Ормонов баштаган тиешелүү мекемелердин өкүлдөрү катышты.
Анда алдыдагы жайкы эс алуу мезгилине даярдык, тармактагы көйгөйлөр жана коюлуучу талаптар кеңири талкууланды. Негизги маселе катары саркынды суу көйгөйү көтөрүлдү. Анда бардык эс алуу жайлары саркынды сууларды жөнгө салуу маселесин биринчи кезекте чечиши керектиги белгиленди. Экологияны сактоо максатында саркынды сууларды тазалоо системасы талапка жооп бербеген объектилерге иштөөгө уруксат берилбеши керектиги айтылды.
Жыйындын жүрүшүндө эс алуу жайларына коюлган милдеттүү талаптар эске салынып, алар толук аткарылган соң гана тиешелүү паспорт берилип, жайкы мезгилде иштөөгө уруксат берилери маалымдалды.
Мындан тышкары, жайкы сезонго даярдык боюнча негизги талаптардын катарында санитардык нормаларды так сактоо, коопсуздук чараларын күчөтүү жана куткаруу кызматтарынын даярдыгы өзгөчө белгиленди. Ар бир пансионат жана эс алуу жайы куткаруучуларды окутуп, жайкы сезон маалында эс алуучулардын коопсуздугун камсыздоого милдеттүү экени айтылды.
Ошондой эле жыйында суу үстүндөгү транспорт каражаттары жана эс алуу маалында колдонулуучу техникалар боюнча маселе көтөрүлүп, быйыл кайсы техникаларга уруксат берилери жана кайсыларына тыюу салынары тууралуу түшүндүрмө берилди.
Ысык-Көл районунун акими Жапарбек Ормонов жыйын учурунда эс алуу жайларынын эң башкы жоопкерчилиги — көлдүн экологиясын сактоо экенин белгиледи. Анын айтымында, табиятка аяр мамиле кылуу жана айлана-чөйрөнү коргоо ар бир ишкердин негизги милдети болушу керек.
Ысык-Көл районунда жалпысынан 847 рекреациялык объект бар. Анын ичинен 144ү ири эс алуу жайлары — пансионат, лагерь жана санаторийлер болсо, 703ү конок үйлөрү. Бул объектилердин 95и саркынды сууларды тазалоочу жай менен камсыз болгон, 118и башка тазалоочу жайларга кошулган. Ал эми 634 объект септик аркылуу иш алып барат.
Эс алуу жайларынын ишин баштоого уруксат берүүчү атайын паспорт алуу мөөнөтү 20-майга чейин белгиленди. Учурда болгону 12 эс алуу жайы гана паспорт алган. Бийлик өкүлдөрү белгиленген мөөнөткө чейин бардык талаптар толук аткарылышы керектигин эскертип, талаптар аткарылбаса, мындай объектилердин толук ачылышына тыюу салына турганын билдиришти.